الإبتسامة

إبتسم؟ اي ابتسم!
مو شرط تبتسم إذا كنت فرحان مستانس، ابتسم لو ما سويت شي، كافي انها صدقه ببلاش، ( قال رسول الله -صلى الله عليه وسلم- : الإبتسامة في وجه أخيك صدقه.). شتبون أكثر؟.. شوف الفرق لما تشوف واحد مكشر وواحد مبتسم.. المبتسم يكون جميل والي ويهه معبوس يكون أجكر من الجكر نفسه *قبيح* بعيدا عن الجمال الشكلي او المظهري.. الإبتسامة تعطي طاقه إيجابيه ماكو أروع منها، كافي لو شفت إنسان غالي عليك مبتسم تبتسم لا إراديا، الإبتسامه تزيدك جمال وفتنه، ونفس وروح ولا احلى منها ..

ساعات نبتسم لما نكون مضايقين أو حزينين، علشان ما يبين على ملامحنا شنو احنا نحمل من مشاعر ضيق، هم، أو كدر.. ، ومع هذا البعض ينسى شنو سبب ضيقته؟، صحيح الإبتسامه أسهل من إنك تعبس ويهك، بس مو علشان الابتسامه سهله نبستم، علشانها أفضل واحلى نبتسم، واحنا دايما نحب نسوي الشي الأسهل ونكره الصعايب؟ كاهي الإبتسامه سهله ما يبيلها شي، وفوق هذا لها أجر وتقربك من الناس اكثر وتكسب محبتهم..

بالسوق أشوف بنيه ابتسم لها، ما تردلي الابتسامه، شراح تخسرين لو ما إبتسمتي؟، يالج الاجر لي عندج ورديته؟ ابتسمي، ضحكي، تغشمري.. وانسي همومج، وانسي امس وإلي قبله، اتركي المستقبل حق باجر، وبلشي اليوم، طالعي اليوم وانسي حزن إلي راح، ولا تحاتين المستقبل دامج اليوم موجوده وبإمكانج تسوين إلي تبينه..

تدرين الإبتسامه أحسن من الميكب إلي مترسته بويهج؟ اي احسن بوايد، تجمل ويهج اكثر، تخليج بشوشه اكثر من ما انتي كنتي بشوشه.. وعلى قولتهم: Smile is a makeup that any girl can wear.